Selebrasyon ng Buwan ng Nutrisyon, nagsimula na sa Bulacan

ni Vinson F. Concepcion

LUNGSOD NG MALOLOS, Bulacan, Hulyo 4 (PIA) -- Sinimulan na ng

pamahalaang panlalawigan ng Bulacan ang taunang selebrasyon ng Buwan

ng Nutrisyon sa Bulacan Capitol Gymnasium sa lungsod na ito nitong

lunes.

Ayon kay gobernador Wilhelmino M. Sy- Alvarado, alinsunod sa

Presidential Decree No. 491 o “Nutrition Act of the Philippines,”

isinasagawa taun-taon ang iba’t ibang programang pang-nutrisyon kung

saan ang tema ngayon taon ay “Pagkain ng gulay ugaliin, araw-araw

itong ihain.”

“Layunin ng pagdiriwang ang patuloy na gisingin ang kamalayan ng

publiko tungkol sa kahalagahan ng wastong nutrisyon. Ngayong taon,

lalo pang pinaigting ang kampanya upang mahikayat ang lahat ng sektor

ng ating lipunan na kumain ng gulay para sa dagdag na sustansya sa

katawan at upang maiwasan ang mga sakit tulad ng diabetes at kanser,”

anang gobernador.

Kabilang din sa mga isasagawang aktibidad ay ang pagsasagawa ng iba’t

ibang gawain sa mga bayan at lungsod tulad ng food festival, cooking

contest, poster at slogan-making contest sa mga paaralan, at

information forum.

Isasagawa rin ang Malunggay Cooking Contest na lalahukan ng mga

Lingkod Lingap sa Nayon at Mother Leader sa bawat bayan at lungsod

kung saan ang lahat ng mga nanalong recipes ay pagsasama-samahin upang

makabuo ng recipe book na Lutong Bulakenyo.

Magkakaroon din ng pagtitipon ang 803 may-ari ng panaderya at panadero

sa Kongreso ng mga Panadero kung saan sila ay bibigyan ng kaalaman at

pagsasanay ng Department of Science and Technology-Food and Science

Research Institute tungkol sa paglalagay ng gulay tulad ng malunggay

sa pandesal.

Magtatapos ang mga gawain sa Buwan ng Nutrisyon sa pagbibigay ng

karangalan sa mga natatanging bayan, barangay at Lingkod Lingap sa

Nayon na nagkaroon ng makabuluhang programa sa nutrisyon para sa taong

2011. (CLJD/VFC-PIA3)